Koktebel Jazz Partyнинъ экинджи куню фестиваль санасында халкъ могъол йырлары янъыгъырайджакъ, оларны Корея, Могъолистан, Русие ве Алманиядан чалгъыджыларны бирлештирген East-West Connection квинтети иджра этеджек.
«Коктебельде аджайип, фестиваль бойле юксек севиеде тешкиль этильмеси ичюн даа бир кере тешеккюрлер бильдирмеге истер эдим. Бугунь биз могъол йырларны ве махсус бу фестиваль ичюн азырлангъан, аранжировка этльген музыканы иджра этеджемиз», — деди квинтетнинъ вокалджысы Anjie.
East-West Connectionнынъ лидери, Мартин Зенкер икяе этти ки, чалгъыджылар оларны насыл къаршылагъанларына коре, программаны бираз денъиштиреджеклер.
«Языкъ ки, бизим вакъытымыз сынъырлы, эгер бизде эки-учь саатымыз олса эди, биз чокъча чалар эдик. Амма бизде бир саат ве не чалмакъны сечмек агъыр олды. Бизим репертуарымызда бир къач меним ве Павел Скорняковнынъ эсеримиз бар. Бизни сейирджилер насыл къаршылагъанларына коре, биз бир биримизге келишип, программанынъ чешит вариантларыны сече билемиз», — деди чалгъыджы.
Зенкер эм де тариф этти ки, East-West Connection коллективи эки йыл эвельси яратылгъан эди. О заман о Могъалистанда экен ве аньаневий могъол музыканы джазгъа къошып бакъмагъа къарар алды.
«Музыка — бу универсаль тиль.Эльбетте, музыкагъа мунасебетке, оны къабул этювге даир чешит хусусиетлер бар. Амма ахыр-сонъу биз бир тильде къонушамыз, бизим макъсадымыз бир, ве бу бизге мувафакъиет иле чалышмагъа имкян бере», — деп, къайд этти о.