Бугунь Koktebel Jazz Party фестивалинде кларнетчи, саксофонджы, бестекяр, аранжировкаджы, бютюн дюньяда танылгъан фин джаз чалгъыджыларындан бири Антти Сарпила Георгий Гараняннынъ краснодар биг-бэнди иле чыкъышта булунаджакълар.
Чалгъыджылар саба матбуат-конференцияда икяе эткенлерине коре, чыкъыш свинг къыралы Бенни Гудманнынъ иджадына багъышланаджакъ, амма тек онынъ эсерлери иле сынъырланмайджакъ. «Биз Бенни Гудманнынъ классик эсерлерини чаладжамыз, амма буннен берабер биз онынъ фаалиетинден тыш чыкъаджамыз. Айры алда бизде Чайковскийнинъ "Спящая красавица" эсеринден парча оладжакъ», — деди Сарпила.
Онынъ сёзлерине коре, оларнынъ программасынынъ макъсадларындан бири — чешит несиллерни классик джаз музыка иле таныштырмакъ. «АкъШ-да джаз концертлер динълейджилерининъ орта дередже яшы кет-кете юкселе. Авропада сейирджилер баягъы яшча. Русиеде исе — мен эм Москвада, эм Къазанда, эм Санкт-Петербургта, эм де Краснодарда чалгъан эдим — феркъ шунда ки, концертлерге чешит яштаки динълейджилер келелер», — деп, къайд этти фин чалгъыджы.
О эм де къошты ки, фестиваль тешкиль этильмесинен пек мемнюн, келеджекте Коктебельде озь Antti Sarpila Swing Band такъымы иле чыкъышта булунмагъа азыр.
Озь невбетинде Георгий Гаранян биг-бэндининъ иштиракчиси Илья Филиппов тариф этти ки, оркестр давет этильген соло йырджылар иле бойле киби интернациональ лейхаларда мемнюниетле иштирак эте. «Антти киби иджраджы иле чалышмакъ — биз ичюн эр даим къуванч, чюнки о Бенни Гудманнынъ классик свингининъ девирини олдукъча догъру тасвир эте. Ве бу фестиваль ичюн биз бойле программа яратмагъа истедик, чюнки о тамам джаз классикасына аит», — деп, къайд этти о.