2015 сене Koktebel Jazz Party халкъара джаз фестивалине билетлер сатылувындан топланылгъан ве сонъра Коктебель къасабасынынъ 1 санлы мектебине теслим этильген хайрие паралары мектеп азбарынынъ капиталь тамирине ве абаданлашувына масраф этильди. Бугуньки куньге ишлер аман-аман сонъуна етти, деп хабер этти РИА Хаберлерине (Къырым) Коктебель мектебининъ мудир вазифесини эда эткен Сергей Жирадков. «Мектепнинъ ички азбары тамирленюви екюнленди. Эски плитка толусынен алынды, топракъ догъуртылмасы, темель гъайрыдан къоюлмасы, дренаж орьтю ве янъы плитка ерлештирюв боюнджа ишлер кечирильди. Якъында ягъгъан ягъмурлар косьтергени киби, дренаж система пек гузель чалыша. Мейданда эм де демир скемлелер ерлештирильди», — деп, тариф этти мектеп мудири.
Бундан гъайры Жирадков хабер этти ки, параларнынъ кичик бир къысмы мектеп одаларында янгъынгъа къаршы хавфсызлыкъ темин этилювине масраф этильди. Янъы янгъынгъа къаршы къалкъан, янгъынны сёндюрген шейлер (къум иле ящик, къырынты, куреклер, къопкъалар ве иляхри),янгъынны сёндюриджилер сатын алынды.
«Мектеп абаданлаштырувы ичюн назарда тутулгъан паралар толусынен масраф этильди», — деп, къайд этти мектеп мудири. Жирадков ишандырды ки, хайрие параларынынъ масраф этильмеси ачыкъ-айдын кечти, бу ишлерде мектепнинъ васийлик шурасы ишбирлик косьтерди, фестиваль тешкилятчысы — «Красный квадрат» ширкети исе эр шейни незарет алтында тутты. Кечирильген тамир ишлерине даир эписи весикъалар Коктебель мектебининъ ресмий сайтында ерлештирильген. 2015 сене Koktebel Jazz Party халкъара джаз фестивали Коктебельде августнынъ 28-30 куньлери кечти. Бренднинъ укъукъсаиби «Россия сегодня» халкъара инфомацион агетлиги ола, 2015 сене тедбир тешкилятчысы оларакъ «Красный квадрат» ширкети чыкъты. Генераль шерик Умумрусие девлет телерадиоширкети олды. Фестиваль РФ Медениет назирлигининъ къол тутувы иле кечти.
2015 сене фестиваль ачылувында «Россия сегодня» халкъара информацион агентликнинъ генераль мудири Дмитрий Киселев сейирджилерге хабер этти ки, бу сене паралар Коктебель къасабасынынъ 1 санлы мектебининъ маддий-иехникий донатылмасына догъурталаджакъ. 2016 сене январь айында «Красный квадрат» ширкети Коктебель мектебине малие ёллады. Озь невбетинде мектепнинъ васийлик шурасы биринджи невбетте тургъан тедбирлерни бельгиледи, бу малие тамам бу макъсадларгъа масраф этиледжек.