«Чыкъышта булунгъан вакъытта биз бир шей иле тааджиплендирмейджемиз, чюнки бугунь, керчектен де, бир кимсени джазда тааджиплендирмек — пек агъыр», — деп, ишандырды журналистлерни Роберт Анчиполовский. Онынъ сёзлерине коре, квартет озь интерпретациясында американ джаз стандартларны такъдим этеджек.
«Бу фестивальде акъикъий джаз иджра эткен чалгъыджылар топлангъаны къувандыра. Бугунь бутюн дюньяда чокъусы фестиваллерде джаз неичюндир башкъа тарафкъа кетти — чокъунча бир де бир этник такъымлар, фанк теркиплер чыкъышта булуналар, оларны джазгъа якъын деп, адламакъ мумкюн», — деп, къайд этти о.
Чалгъыджы тюнкевин акъшам концертке етиштирди, Краснодардан кельген биг-бэндни динъледи, ве чыкъышларнынъ ве сеснинъ кейфиетине къыймет кести. «Тышта, авада кечирильген фестиваллерде гузель сеске иришмек къыйын — эм ель, эм ава шараити. Амма мында оркестр аджайип янъгъырады», — деди Роберт Анчиполовский.
Роберт Анчиполовский Квартетининъ иштиракчилери фестивальнинъ хусусий муитини къайд эттилер. Вокал йырджы Джанин Картер айтты ки, онъа русиели сейирджилер огюнде чыкъышта булунмакъ пек хош келе, чюки олар музыканы яхшы сезелер. «Бутюн бу ер гъайрет иле толып таша — музыкадан инсанларгъадже. Акъшам эр шейимиз аля дереджеде олур деп, тюшюнем », — деп, къошты о.
Онынъ сёзлерине коре, АкъШ-да ве Русиеде сейирджилер арасында пек буюк фаркъ бар. «Мында джазны чешит несиллерге аит инсанлар динълейлер, АкъШ-да исе — динълейиджилер баягъы эслидже. Ве Русиеде концертлер вакъытында тамам динълейлер, Америкада исе музыка, чокъусы алларда вакъыт кечирювде земин ола. Амма чалмакъ эр ерде гузель ве эр ерде меракълы», — деп, екюнледи Джанин Картер.